Թրիլլեր Մադրիդում. Ատլետիկոն ու Խետաֆեն գերգոլառատ խաղում չպարզեցին հաղթողին🎥

Իսպանական Լա լիգայի 18-րդ տուրում «Ատլետիկո Մադրիդը» սեփական հարկի տակ մրցեց «Խետաֆեի» դեմ։

Հանդիպումը բավական անհաջող ընթացք ստացավ «հնդկացիների» համար, քանի որ արդեն 38-րդ րոպեին մնացին 10 ֆուտբոլիստներով։

Ստեֆան Սավիչը, ստանալով երկրորդ դեղին քարտը, հեռացվեց դաշտից։

Նույնիսկ դաշտում ունենալով մեկ ֆուտբոլիստ պակաս` Դիեգո Սիմեոնեի թիմը նախքան ընդմիջում բացեց հաշիվը. 44-րդ րոպեին աչքի ընկավ Անտուան Գրիզմանը։

Երկրորդ կեսի հենց մեկնարկում` 53-րդ րոպեին, «Խետաֆեն» Բորխա Մայորալի ջանքերով խփեց պատասխան գոլը։

«Ատլետիկոն» շատ արագ կրկին հաշվի մեջ առաջ անցավ. 63-րդ րոպեին աչքի ընկավ Ալվարո Մորատան։

69-րդ րոպեին էլ Գրիզմանը դարձավ դուբլի հեղինակ և հաշիվը դարձրեց արդեն 3:1։

Նշենք, որ ֆրանսիացի հարձակվողը մադրիդկյան ակումբի կազմում պաշտոնական խաղերում խփեց 173-րդ գոլը և հավասարվեց «հնդկացիների» պատմության լավագույն ռմբարկու Լուիս Արագոնեսին։

Թվում էր` տանտերերը բաց չեն թողի երկու գնդակի առավելությունը, սակայն այդ սցենարի հետ հավասար չէին «Խետաֆեի» ֆուտբոլիստները, ովքեր երկրորդ խաղակեսի ողջ ընթացքում ունեին խաղային և տարածքային լուրջ առավելություն։

Հյուրերի կազմից Օսկար Ռոդրիգեսը 87-րդ րոպեին նախ կրճատեց հաշիվը, ապա 90+3-րդ րոպեին Բորխա Մայորալը դիպուկ իրացրեց 11-մետրանոցը, նույնպես դարձավ դուբլի հեղինակ և թրիլլերային ոչ-ոքի պարգևեց «Խետաֆեին»։

Մայորալը Լա լիգայի ընթացիկ խաղարկությունում խփել է արդեն 12 գոլ և լավագույն ռմբարկուների պայքարում բարձրացավ 2-րդ հորիզոնական։

26-ամյա հարձակվողը զիջում է միայն «Ռեալ Մադրիդի» կիսապաշտպան Ջուդ Բելինգհեմին, ով խփել է 13 գոլ։

Այսպիսով, հանդիպումն ավարտվեց 3:3 հաշվով, ինչից հետո «Ատլետիկոն» վաստակեց 35 միավոր և զբաղեցնում է 3-րդ հորիզոնականը։

«Խետաֆեն», 26 միավորով, 8-րդն է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am