Գործարքը կայացած է. Կարիմ Բենզեման տեղափոխվում է Ալ Իթիհադ

«Ռեալ Մադրիդի» հարձակվող Կարիմ Բենզեման ազատ գործակալի կարգավիճակում կտեղափոխվի Սաուդյան Արաբիան ներկայացնող «Ալ Իթիհադ» ակումբ։

Ինչպես տեղեկացնում է ինսայդեր Ֆաբրիցիո Ռոմանոն, կողմերը գործարքի հարցում հասել են վերջնական համաձայնության։

Աղբյուրի փոխանցմամբ` 35-ամյա ֆուտբոլիստը գործարքն ավարտին հասցնելու համար արդեն ստորագրել է նախատեսված փաստաթղթերի հիմնական մասը։

Կողմերի միջև պայմանագիրը կնքվելու է մինչև 2025 թ. հունիսի 30-ը, որն ունենալու է այն ևս մեկ տարով երկարաձգելու հնարավորություն։

Նշվում է, Բենզեման նոր ակումբի կազմում վաստակելու է տարեկան 200 մլն եվրո աշխատավարձ, որը ներառելու է նաև տարբեր հավելավճարներն ու կոմերցիոն պայմանագրերից ստացված եկամուտները։

Հունիսի 6-ին ֆրանսիացի հարձակվողը հրաժեշտ կտա «Ռեալի» ֆուտբոլիստներին, մարզչական շտաբին, ղեկավարությանը և երկրպագուներին, ինչից հետո կմեկնի Սաուդյան Արաբիա։

Հավելենք, որ «Ալ Իթիհադն» ավարտված մրցաշրջանում վաստակել է 72 միավոր և դարձել Սաուդյան Արաբիայի Պրեմեր լիգայի չեմպիոն։

Հիշեցնենք, որ Կրիշտիանու Ռոնալդուն նույնպես հանդես է գալիս սաուդարաբական ակումբի կազմում և պաշտպանում է «Ալ Նասրի» գույները։

Ավելացնենք, որ Կարիմ Բենզեման «Ռեալի» կազմում հանդես էր գալիս 2009 թ. հուլիսից` անցկացրած 648 խաղում դառնալով 354 գոլի և 165 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am