Բունդեսլիգան ներկայացնող ակումբն ակնարկել է Ազմունին ձեռք բերելու մասին

Սանկտ Պետերբուրգի «Զենիթի» հարձակվող Սերդար Ազմունը, ամենայն հավանականությամբ, կարիերան շարունակելու է «Բայերի» կազմում։

Լևերկուզենը ներկայացնող ակումբը նույնիսկ Twitter-ի իր էջում գրառում է կատարել` ակնարկելով իրանցի հարձակվողի մոտալուց տրանսֆերի մասին։

Այդ գրառմանն արձագանքել է նաև 26-ամյա ֆուտբոլիստի նախկին ակումբը` «Ռուբինը»։

Կազանը ներկայացնող ակումբն էլ կիսվել է «Բայերի» Twit-ով և «Զենիթին» հիշեցրել, որ խաղացողի տրանսֆերից ինքը նույնպես մասնաբաժին ունի։

Հատկանշական է, որ Ազմունի հաջորդ վաճառքից «Ռուբինը» ստանալու է գումարի 20%-ը։

Ավելի վաղ տեղեկություն տարածվեց, որ «Բայերը» Ազմունի տրանսֆերի դիմաց ռուսական ակումբին վճարելու է 18 մլն եվրո, իսկ նրա հետ կնքելու է 5 տարվա պայմանագիր` տարեկան 2.8 մլն եվրո աշխատավարձով։

Հավելենք, որ Սերդար Ազմունը «Զենիթի» կազմում հանդես է գալիս 2019 թ. փետրվարից և մինչ այս պահն ակումբի մարզաշապիկով անցկացրել է 85 հանդիպում` դառնալով 54 գոլի և 19 գոլային փոխանցման հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am