Բորուսիան դիմացավ Բավարիայի ճնշմանը` միավորներ խլելով չեմպիոնից🎥

Մեկնարկեց Բունդեսլիգայի նոր` 2021/22 մրցաշրջանը։

1-ին տուրի շրջանակում Մյունխենգլադբախի «Բորուսիան» սեփական հարկի տակ մրցեց գործող չեմպիոն «Բավարիայի» դեմ։

Հանդիպումը, կարելի է ասել, բավական անսպասելի մեկնարկեց, քանի որ արդեն 10-րդ րոպեին Ալասան Պլեայի ջանքերով «Բորուսիան» առաջ անցավ հաշվի մեջ։

Բաց թողած գոլից անմիջապես հետո «Բավարիան» սկսեց տիրել հանդիպման նախաձեռնությանը և 43-րդ րոպեին, ի վերջո, հավասարեցրեց հաշիվը. Յոզուա Կիմիխի իրացրած անկյունայինից հետո աչքի ընկավ Ռոբերտ Լևանդովսկին, իսկ կողմերն ընդմիջման գնացին 1:1 հաշվի պայմաններում։

Երկրորդ խաղակեսում էլ Յուլիան Նագելսմանի սաներն ունեին խաղային ու տարածքային առավելություն. միայն Լևանդովսկին երկու-երեք անգամ կարող էր հաղթանակի նժարը թեքել մյունխենյան ակումբի կողմը, սակայն «Բորուսիայի» դարպասապահ Յան Զոմերը որոշ դրվագներում փրկեց իր թիմին վերահաս գոլից։

70-րդ րոպեին էլ գոլային լավ պահ ուներ մյունխենգլադբախցիների ավագ Լարս Շտինդլը, սակայն հիանալի գործեց Մանուել Նոյերը։

Խաղի վերջին գրոհի արդյուքնում Յոզուա Կիմիխը 90+6-րդ րոպեին քիչ մնաց հաղթանակ կորզեր «Բավարիայի» համար, սակայն գերմանացի կիսապաշտպանի հարվածը մի փոքր շեղ ստացվեց։

Ամեն դեպքում, «Բորուսիա Մյունխենգլադբախը» դիմացավ «Բավարիայի» ճնշմանը և միավորներ խլեց գոծող չեմպիոնից։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am