Բարսելոնան ցանկանում է, որ RFEF-ը ճանաչի ակումբի` 1937 թ. չեմպիոնական տիտղոսը

«Բարսելոնան» ցանկանում է, որ օրինական ճանաչվի ակումբի` 1937 թ. նվաճած չեմպիոնական տիտղոսը։

Բանն այն է, որ 1936-39 թթ. Լա լիգան չի անցկացվել, քանի որ Իսպանիայում քաղաքացիական պատերազմ էր։

Այդ ընթացքում մի շարք ակումբներ, այդ թվում նաև` «Բարսելոնան», մասնակցում էին Միջերկրածովյան լիգային, որի շրջանակում «բլաուգրանան» 1937 թվականին դարձել է չեմպիոն։

Ինչպես տեղեկացնում է ESPN-ն, այժն կատալոնական ակումբի ղեկավարությունն աշխատում է, որպեսզի Իսպայիայի թագավորական ֆուտբոլի ֆեդերացիան` RFEF-ն, օրինական ճանաչի այդ չեմպիոնական տիտղոսը։

Հատկանշական է, որ ֆեդերացիան չի պատրաստվում օրինական ճանաչել «Բարսելոնայի» չեմպիոնական այդ տիտղոսը, քանի որ այդ ժամանակահատվածում Իսպանիայում օրենքով արգելված է եղել սպորտային որևէ իրադարձության կազմակերպումն ու անցկացումը։

Նշվում է, որ «Բարսելոնան» ցանկանում է հիմնվել այն փաստի և հիմքի վրա, որ ֆեդերացիան վերջերս օրինական է ճանաչել նույն թվականին անցկացված Ազատ Իսպանիայի գավաթի խաղարկությունը, որի հաղթող է դարձել «Լևանտեն»։

Ընդ որում, «Բարսելոնան» դեռ 2009 թվականին է փորձել է օրինականացնել այդ տիտղոսը, սակայն ֆեդերացիան հրաժարվել է։

Հավելենք, որ Միջերկրածովյան առաջնությունն անցկացվել է Կատալոնիայի ֆուտբոլի ֆեդերացիայի հովանու ներքո, որին, բացի «Բարսելոնայից», մասնակցում էին նաև «Էսպանյոլը», «Ժիրոնան», «Վալենսիան», «Լևանտեն», «Խիմնաստիկը», «Գրանոլիերսը» և «Ատլետիկ դե Կաստելիոնը»։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am