Բարսելոնան ցանկանում է գնել Մարոկկոյի հավաքականի կիսապաշտպանին

«Բարսելոնան» հետաքրքրված է Մարոկկոյի հավաքականի և ֆրանսիական Լիգա 1-ը ներկայացնող «Անժերի» կիսապաշտպան Ազեդին Ունահիի ծառայություններով։

Ինչպես տեղեկացնում է Mundo Deportivo-ն, կատալոնական ակումբը մտադիր է 2023 թ. ձմեռային տրանսֆերային պատուհանի ժամանակ ամրապնդել կենտրոնական կիսապաշտպանի գոտին, որի հիմնական թեկնածուները «Մանչեսթեր Սիթիի» ֆուտբոլիստներ Բերնարդու Սիլվան և Իլկայ Գյունդողանն են, սակայն ֆինանսական խնդիրների պատճառով «բլաուգրանան» չի կարող իրականացնել նրանցից որևէ մեկի գործարքը։

Այդ ամենով պայմանավորված` «կապտանռնագույնները» շեշտը դրել են Ունահիին ձեռք բերելու վրա։

22-ամյա ֆուտբոլիստի խաղը շատ է դուր գալիս «Բարսելոնայի» մարզչական շտաբին և նրան մեծ ներուժ ունեցող ֆուտբոլիստ են համարում։

Բացի դրանից, երիտասարդ ֆուտբոլիստի տրանսֆերը «Բարսելոնայի» համար անհամեմատ մատչելի կարժենա։

Այդուհանդերձ, «բլաուգրանայի» ղեկավարությունը հասկանում է նաև, որ Ունահիի` ԱԱ-2022-ում ունեցած մրցելույթները կմեծացնեն այլ ակումբների` նրա նկատմամբ հետաքրքրությունը, այդ պատճառով էլ «Բարսելոնան» մտադիր է որքան հնարավոր է շուտ գործի անցնել այս հարցում։

Հավելենք, որ Ազեդին Ունահին «Անժերի» կազմում հանդես է գալիս 2021 թ. հուլիսից` անցկացրած 47 խաղում դառնալով 2 գոլի և նույնքան գոլային փոխանցման հեղինակ։

Ունահին ընթացիկ աշխարհի առաջնության շրջանակում գրեթե առանց փոխարինման մասնակցել է Մարոկկոյի հավաքականի բոլոր 5 հանդիպումներին` «ատլասե առյուծների» հետ դուրս գալով մրցաշարի կիսաեզրափակիչ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am