Բարսելոնան պարզաբանում է պահանջում Լևանդովսկիի չեղարկված գոլի համար 🎥

«Բարսելոնան» իսպանական Լա լիգայի 13-րդ տուրի «Ռեալ Սոսիեդադի» դեմ արտագնա խաղում (0:1) ակումբի հարձակվող Ռոբերտ Լևանդովսկիի չեղարկված գոլի համար բացատրություն է պահանջում։

Relevo-ի հաղորդմամբ` կատալոնական ակումբը ցանկանում է իմանալ, թե իրականում ինչ է տեղի ունեցել այդ դրվագում, որպեսզի ապագայում կարողանա խուսափել նմանատիպ իրավիճակներից։

«Բլաուգրանային» չի բավարարել այն բացատրությունը, որ ուղիղ եթերում սխալ կադր է ընտրվել։ Իսպանիայի ֆուտբոլի ֆեդերացիայի մրցավարնական հանձնաժողովը պնդում է, թե VAR-ի պատասխանատուները դանդաղեցված կադրը ճիշտ են ընտրել` կանոնների խախտում արձանագրելու համար։

Հաղորդվում է, որ «Բարսելոնայի» ղեկավարները քանիցս դիտել են այդ դրվագը և համոզված են, որ Լևանդովսկին չի եղել խաղից դուրս իրավիճակում։

Հիշեցնենք, որ «Ռեալ Սոսիեդադի» դեմ հանդիպման 13-րդ րոպեին լեհ ֆուտբոլիստը գրավել է մրցակցի դարպասը, սակայն գլխավոր մրցավար Գիլերմո Կուադրան դիտել է դրվագի տեսակրկնապատկերն ու չնչին խաղից դուրսի պատճառով չեղարկել գոլը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. Ֆուտբոլային մարզաշապիկներ կարող եք ձեռք բերել isport օնլայն խանութից