Բարսելոնայի երիտասարդ կիսապաշտպանը կտեղափոխվի Ռոմա

Կատալոնական «Բարսելոնայի» վինգեր Չարլզ Պերեսը կարիերան կշարունակի «Ռոմայի» կազմում։ Այս մասին տեղեկացնում է Sky Sports-ի լրագրող Ֆաբրիցո Ռոմանոն, ով հղում է կատարում մեկ այլ լրագրող Ջանլուկա դի Մարցիոյին։

Հռոմիական ակումը կվարձակալի 21-ամյա խաղացողին մինչև մրցաշրջանի ավարտ՝ հետագայում իրավունք ունենալով գնել նաև խաղացողի ամբողջական տրանսֆերը։ Գործարքի ընդհանուր արժեքը կկազմի 13 մլն եվրո։

Ըստ աղբյուրի՝ «Ռոմային» մնացել է միայն Պերեսի հետ համաձայնեցնել անձնական պայմանագրի մանրամասները։ Ակումբը երիտասարդ խաղացողի միջոցով ցանկանում է փոխարինել ծանր վնասվածք ստացած Նիկոլո Ձանիոլոյին։

Չարլզ Պերեսը Լա լիգայի ընթացիկ մրցաշրջանում մասնակցել է 10 հանդիպման՝ դառնալով 1 գոլի և 3 գոլային փոխանցման հեղինակ։