Արքայական ակումբը հիանալի մարզավիճակում է․ Ռեալ Սոսիեդադն ու Վալենսիան կարևոր հաղթանակներ տարան?

Մեկնարկել է իսպանական Լա լիգայի 15-րդ տուրը։ Առաջատար Մադրիդի «Ռեալը» երեկ հյուրընկալվելիս առավելության հասավ «Ալավեսի» նկատմամբ։ Խաղն ավարտվեց 1։2 հաշվով։

Խաղի հաշիվը բացվեց 52-րդ րոպեին։ Տոնի Կրոսի տուգանայինից կատարած փոխանցումից հետո գլխի հարվածով աչքի ընկավ մադրիդցիների ավագ Սերխիո Ռամոսը։

65-րդ րոպեին տանտերերը 11 մետրանոց վաստակեցին, որն անվրեպ իրացրեց Լուկաս Պերեսը, սակայն ընդամենը 4 րոպե անց՝ 69-րդ րոպեին, Զիդանի սաները կրկին առաջ անցան․ գոլի հեղինակ դարձավ Դանի Կարվախալը։

«Սերուցքայինները» բոլոր մրցաշարերում իրենց անպարտելի խաղերը հասցրին ութի։

Մրցաշրջանը անհաջող մեկնարկած «Վալենսիան» քիչ-քիչ հավաքում է իր հասանելիք միավորների պաշարը: Ալբերտ Սելադեսի սաներն այս անգամ սեփական հարկի տակ 2։1 հաշվով առավելության հասան մրցաշրջանի ևս մեկ ձախողակ «Վիլյառեալի» նկատմամբ, որն արդեն 5 խաղ հաղթանակ չունի՝ կրելով չորրորդ պարտությունը։

Հանդիպումը կարող էր այլ սցենար ունենալ, եթե հյուրերի կազմից Խերարդ Մորենոն 15-րդ րոպեին հստակ իրացներ 11 մետրանոց հարվածը։

Խաղի հաշիվը 49-րդ րոպեին բացեց տանտերերի գոլահար Ռոդրիգոն։ 5 րոպե անց՝ 54-րդ րոպեին հաշիվը հավասարվեց։ Հյուրերի կազմում աչքի ընկավ կամերունցի կիսապաշտպան Անդրե-Ֆրանկ Զամբոն։

«Չղջիկներին» 70-րդ րոպեին հաղթանակ պարգևեց Երևանի խաղադաշտերում փայլած Ֆերրան Տոռռեսը։

Երեկ Սան Սեբաստիանի «Անոետա» մարզադաշտում տեղի ունեցավ փոքրիկ բասկյան դերբի, որի շրջանակում մրցեցին «Ռեալ Սոսիեդադն» ու «Էյբարը»։ Բասկյան երկու ակումբները գտնվում են մրցաշարային աղյուսակի հակադիր բևեռներում։ Եթե «Ռեալ Սոսիեդադն» այս մրցաշրջանում հիանալի տեսք ունի և պայքարում է Չեմպիոնների լիգայի ուղեգրի համար, ապա «Էյբարը» փորձում է տեղը պահպանել պրեմիերայում։

Տատներերը ոչ մի շանս չտվեցին «Էյբարին»՝ վաստակելով հերթական 3 միավորը։ Խաղն ավարտվեց 4։1 հաշվով։ Իմանոլ Ալգուասիլի սաների կազմում աչքի ընկան Ռոբին լե Նորմանը, Միկել Օյարսաբալը, Վիլիան Ժոզեն, ինչպես նաև Մարտին Էդեգորը։ «Էյբարի» կազմում միակ գնդակը խփեց Պապե Դիոպը։

Այս պարտությունը «Էյբարի» համար դարձավ երրորդ անընդմեջը։

Ավարտված հանդիպումներում գրանցվել են հետևյալ արդյունքները․

«Սելտա» 0։0 «Վալյադոլիդ»

«Մալյորկա» 1։2 «Բետիս»

Մադրիդի «Ռեալը» տանելով հերթական հաղթանակը՝ 31 միավորով միանձնյա բարձրացավ 1-ին հորիզոնական, սակայն կատալոնական «Բարսելոնան» իր հանդիպումը դեռևս չի անցկացրել, որը տուրի կենտրոնական հանդիպման շրջանակում այսօր ուղիղ կեսգիշերին կհյուրընկալվի «Ատլետիկո Մադրիդին»։

«Վալենսիան» 23 միավորով բարձրացավ 7-րդ հորիզոնական, իսկ «Ռեալ Սոսիեդադը» 26 միավորով 4-րդն է։