Տրենտ Ալեքսանդր-Առնոլդի տպավորիչ ցուցանիշը

Անգլիական Պրեմիեր լիգայի 24-րդ տուրում «Լիվերպուլը» հյուրընկալվելիս 1։2 հաշվով հաղթեց «Վուլվերհեմպտոնին»։

Հանդիպման 8-րդ րոպեին «Լիվերպուլի» աջ պաշտպան Տրենտ Ալեքսանդր-Առնոլդը հերթական գոլային փոխանցումը գրանցեց իր հաշվին։ Անկյունայինից կատարած փոխանցումից հետո հանդիպման հաշիվը բացեց Ջորդան Հենդերսոնը։

21-ամյա պաշտպանը 2018/19 մրցաշրջանի մեկնարկից սկսած կատարել է արդեն 22 գոլային փոխանցում (նվազագույնը 5 գոլային ավելի շատ, քան ԱՊԼ-ի ցանկացած այլ ֆուտբոլիստ), որոնցից 10-ը գրանցվել է ստանդարտ դիրքի իրացումից հետո։ Երկու ցուցանիշով էլ Պրեմիեր լիգայում Տրենտը լավագույնն է։

Պրեմիեր լիգայի ընթացիկ մրցաշրջանում պաշտպանը մասնակցել է բոլոր 23 հանդիպումներին՝ խփելով 2 գոլ և կատարելով 11 գոլային փոխանցում։