Նիցցայի ֆուտբոլիստը սպառնում է ինքնասպան լինել` ցած նետվելով կամրջից 📸

Ֆրանսիական Լիգա 1-ը ներկայացնող «Նիցցայի» կիսապաշտպան Ալեքսիս Բեկա Բեկան այս րոպեներին սպառնում է ինքնասպան լինել և ցած նետվել կամրջից։

Ինչպես տեղեկացնում է RMC Sport-ը, 22-ամյա ֆուտբոլիստն այժմ Նիցցայի արվարձաններից մեկում գտնվող Մանյան կամրջի վրա է և սպառնում է իրեն ցած նետել։ Կամուրջն ունի 100 մ բարձրություն։

Աղբյուրի փոխանցմամբ` այժմ ոստիկանությունն ու «Նիցցայի» հոգեբանը տեղում բանակցություններ են վարում ֆրանսիացի ֆուտբոլիստի հետ և փորձում են նրան հետ պահել ծայրահեղ քայլերից։

Հաղորդվում է, որ «Նիցցայում» Բեկա Բեկայի խաղընկեր Կեֆրեն Թյուրամը կապվել է նրա ընկերուհու հետ և խնդրել, որպեսզի վերջինս մեկնի դեպքի վայր։

Ավելի վաղ հաղորդվում էր, որ Բեկա Բեկան և նրա ընկերուհին բաժանվել են, այդ պատճառով էլ 22-ամյա կիսապաշտպանը մտադիր է դիմել նման քայլի։

Նշվում է, որ «Նիցցան» րոպեներ առաջ չեղարկել է այսօր` սեպտեմբերի 29-ին, կայանալիք բոլոր միջոցառումներն, այդ թվում` մամուլի ասուլիսները։

Հավելենք, որ այժմ կամրջի վրա մեքենաների երթևեկությունն արգելափակվել է, այդ պատճառով 5 կմ երկարությամբ խցանում է առաջացել։

Ավելացնենք, որ Ալեքսիս Բեկա Բեկան «Նիցցայի» կազմում հանդես է գալիս 2022 թ. օգոստոսից` անցկացրած 22 խաղում դառնալով 1 գոլի հեղինակ։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am