Դրամա Միլանում. Ինտերն ու Ատալանտան  անհավանական խաղում չպարզեցին հաղթողին🎥

Դրամա Միլանում. Ինտերն ու Ատալանտան անհավանական խաղում չպարզեցին հաղթողին🎥

25/09/2021 - 22:02

Իտալական Ա սերիայի 6-րդ տուրի շրջանակում գործող չեմպիոն «Ինտերը» սեփական հարկի տակ մրցեց «Ատալանատայի» դեմ։

Կարելի է ասել` միլանյան ակումբը հանդիպումն սկսեց մեկ գնդակի առավելությամբ, քանի որ արդեն 5-րդ րոպեին Նիլոլո Բարելայի կատարած հիասքանչ փոխանցումից հետո ոչ պակաս գեղեցիկ գոլի հեղինակ դարձավ Լաուտարո Մարտինեսը` առաջ մղելով «Ինտերին»։

Թվում էր` շոկային մեկնարկը կազդի «Ատալանտայի» ֆուտբոլիստների հոգեբանության վրա, սակայն հակառակ պատկերը տեսանք։

Բաց թողած գոլից անմիջապես հետո Ջանպիերո Գասպերինիի սաներն անմիջապես տիրեցին նախաձեռնությանը և նախքան ընդմիջման գնալն ոչ միայն հավասարեցրին, այլև առաջ անցան հաշվի մեջ։

Նախ 30-րդ րոպեին աչքի ընկավ Ռուսլան Մալինովսկին, ապա 38-րդ րոպեին` Ռաֆայել Տոլոյը։

Կողմերն ընդմիջման գնացին Բերգամոն ներկայացնող ակումբի նվազագույն առավելության պայմաններում։

Երկրորդ խաղակեսն անցավ անհավանական սցենարով։

52-րդ րոպեին «Ատալանտայի» առավելությունը կարող էր մեծացնել Ռուսլան Մալինովսկին, սակայն ուկրաինացի ֆուտբոլիստի իրացրած տուգանային հարվածից հետո գնդակը դիպավ դարպասաձողին։

Այդ դրվագից հետո Սիմոնե Ինձազգիի սաները նետվեցին առաջ` խփելու պատասխան գնդակը։

«Ինտերի» տղաները քիչ-քիչ ձեռք բերեցին խաղային առավելություն, սակայն միայն 72-րդ րոպեին հավասարեցրին հաշիվը. գոլի հեղինակ դարձավ Էդին Ջեկոն։

85-րդ րոպեին տանտերերը վաստակեցին 11-մետրանոց հարվածի իրավունք, քանի որ «Ատալանտայի» պաշտպան Մերիհ Դեմիրալը ձեռքով էր խաղացել սեփական տուգանային հրապարակում։

Նշակետին մոտեցավ «ներաձուրիների» լատերալ Ֆեդերիկո Դիմարկոն, սակայն նրա հարվածը դիպավ դարպասաձողին։

88-րդ րոպեին բերգամոսցիների բազմաքայլ գրոհն ավարտվեց գոլով, որն իր անվան դիմաց գրանցեց Ռոբերտո Պիկոլին։

«Ատալանտայի» ֆուտբոլիստները ցնծում էին և թվում էր` վերջ, հյուրերը հաղթանակ կորզեցին, սակայն վայրկայններ անց հանդիպման գլխավոր մրցավար Ֆաբիո Մարեսկան VAR համակարգի սենյակում աշխատող իր գործընկերներից տեղեկացավ, որ գնդակը դրվագներից մեկում լքել է դաշտի դիմային գիծը, այդ պատճառով էլ չարձանագրվեղ Պիկոլիի խփած գնդակը։

Ամեն դեպքում, խաղն ավարտվեց 2:2 հաշվով. կողմերը կիսեցին միավորը։

Այս ոչ-ոքիից հետո «Ինտերը» վաստակեց 14 միավոր և զբաղեցնում է 3-րդ հորիզոնականը։

«Ատալանտան» էլ 11 միավորով 5-րդն է։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

# , , , , , , , , , , ,

Մեջբերումներ անելիս ակտիվ հղումը Interfootball.am-ին պարտադիր է: Կայքի հոդվածների մասնակի կամ ամբողջական հեռուստառադիոընթերցումն առանց Interfootball.am-ին հղման արգելվում է: Կայքում արտահայտված կարծիքները պարտադիր չէ, որ համընկնեն կայքի խմբագրության տեսակետի հետ: Գովազդների բովանդակության համար կայքը պատասխանատվություն չի կրում:

© Interfootball.am 2019 By Sh.Gor