Գեղեցիկ գոլերի երեկո, Արտետայի առաջին հաղթանակը?
Երեկ՝ հունվարի 1-ին, անգլիական Պրեմիեր լիգայի շրջանակում մեկնարկեց 21-րդ տուրը՝ մատուցելով ամանորյա նվեր ֆուտբոլի իրական սիրահարներին։
Տուրը մեկնարկեց «Բրայթոն» – «Չելսի» հանդիպումով, որն ավարտվեց ոչ-ոքի՝ 1։1 հաշվով։ 10-րդ րոպեին հյուրերին առաջ մղեց թիմի ավագ Սեսար Ասպիլիկուետան, իսկ խաղավարտին մոտ՝ 84-րդ րոպեին, անկյունայինի խաղարկումից հետո ֆանտաստիկ գոլի հեղինակ դարձավ տանտերերի հարձակվող Ալիրեզա Ջահանբախշը։
Հետնապահների թվում ընթացող «Սաութհեմպտոնն» ընդունել էր Ժոզե Մոուրինիոյի «Տոտենհեմին»։ «Սրբերը» հաղթեցին նվազագույն՝ 1։0 հաշվով։ Հանդիպման միակ գնդակը 17-րդ րոպեին հեղինակեց Դանիել Ինգսը՝ ընթացիկ մրցաշրջանում խփելով 13-րդ գնդակը։
Հանս Հազնհյութլի սաները վերջին 4 խաղում տարան 3-րդ հաղթանակը՝ կարգաևորելով մրցաշարային աղյուսակում իրենց գործերը։ «Սաութհմեպտոնն» այժմ վաստակած 25 միավորով զբաղեցնում են 12-րդ հորիզոնականը։
Առաջատարների թվում ընթացող «Լեսթերը» հյուրընկալվելիս 3 անպատսխան գնդակ ուղարկեց «Նյուքասլի» դարպասը։
Բրենդան Ռոջերսի սաների կազմում կրկին բացակայում էր առաջնության լավագույն ռմբարկու Ջեյմի Վարդին, ով 4-րդ անգամ հայր է դարձել։ Սակայն, «աղվեսներին» հաջողվեց նույնիսկ առանց առաջատարի վստահ հաղթանակ տոնել։ Հյուրերի կազմից աչքի ընկան Այոսե Պերեսը, Համազա Չոուդհերին, ինչպես նաև Ջեյմս Մեդիսոնը, ով հեռահար հարվածով դարձավ գեղեցիկ գոլի հեղինակ։
Դևիդ Մոյեսի վերադարձը «Վեսթ Հեմ» շատ տպավորիչ եղավ։ Լոնդոնի «Օլիմպիական» մարզադաշտում տանտերերը 4։0 հաշվով հաղթեցին «Բորնմութին»: Լոնդոնցիների կազմից դուբլի հեղինակ դարձավ Մարկ Նոբլը, մեկական անգամ էլ աչքի ընկան Ֆելիպե Անդերսոնն ու Սեբաստիան Հալերը։ Հատկապես գեղեցիկ ստացվեց Հալերի գոլը՝ մկրատաձև հարվածով գրավելով Արոն Ռամսդեյլի պաշտպանած դարպասը։
Երրորդ հորիզոնականը զբաղեցնող «Մանչեսթեր Սիթին» սեփական հարկի տակ 2։1 հաշվով առավելության հասավ Կառլո Անչելոտիի գլխավորած «Էվերտոնին»։ Տանտերերի կազմից դուբլի հեղինակ դարձավ Գաբրիել Ժեզուսը, իսկ հյուրերի կազմից միակ գնդակը հեղինակեց Ռիչարլիսոնը։
Միկել Արտետայի գլխավորությամբ «Արսենալը» տարավ առաջին հաղթանակը։ «Զինագործները» «Էմիրեյթս» մարզադաշտում 2 անպատասխան գնդակ ուղարկեցին «Մանչեսթեր Յունայթեդի» դարպասը։ Տանտերերին հաղթանակ պարգևեց Նիկոլա Պեպեի և Սոկրատիսի գոլերը։
Կայացած մյուս 3 հանդիպումներում գրանցվել են հետևյալ արդյունքները․
«Նորվիչ» 1։1 «Քրիստալ Փելես»
«Վոթֆորդ» 2։1 «Վուլվերհեմպտոն»
«Բյորնլի» 1։2 «Աստոն Վիլլա»
Այսօր՝ ուշ երեկոյան՝ Երևանի ժամանակով 23։55, կկայանա տուրի վերջին հանդիպումը, որի շրջանակում առաջատար «Լիվերպուլը» կընդունի «Շեֆիլդ Յունայթեդին»։
Կայացած հանդիպումներից հետո մրցաշարային աղյուսակը ստացավ հետևյալ տեսքը․
