ԱԱ-2026-ի մասնակից հավաքականը բանակցել է Չավիի հետ

Չավին կարող է գլխավորել Մարոկկոյի ազգային հավաքականը, հայտնում է The Athletic-ը։

Մարոկկոյի արքայական ֆուտբոլի ֆեդերացիան (FRMF) փետրվարի 24-ին հերքել է, որ գլխավոր մարզիչ Վալիդ Ռեգրագին լքել է պաշտոնը։

Foot Mercato-ի տվյալներով` 50-ամյա մասնագետը դեռ Աֆրիկայի ազգերի գավաթի խաղարկության եզրափակիչում Սենեգալի ազգային հավաքականի կրած պարտությունից հետո էր հրաժարականի դիմում ներկայացրել, որը, սակայն չէր ընդունվել։

Այժմ Ռեգրագին ու FRMF-ն բանակցում են պայմանագրի խզման հարցում։

Մարոկկացի մասնագետը չի ուզում շարունակել աշխատանքը` չնայած աշխարհի առաջնության մեկնարկին մնացել է 6 ամսից քիչ ժամանակ։

Մարոկկոյի արքայական ֆուտբոլի ֆեդերացիան հաստատել է, որ Ռեգրագիին փոխարինելու հարցում բանակցել է մի շարք թեկնածուների հետ, այդ թվում` Չավիի։

«Բարսելոնայի» նախկին գլխավոր մարզիչը պատրաստ է ընդունել մարոկկացիների առաջարկը, բայց նա մտադիր է պաշտոնը ստանձնել միայն ԱԱ-2026-ից հետո։

Կատալոնական ակումբը 46-ամյա Չավիի գլխավորությամբ հանդես է եկել 2021-2024 թվականներին, 143 խաղում տարել է 91 հաղթանակ, գրանցել 23 ոչ-ոքի, կրել 29 պարտություն, դարձել Իսպանիայի չեմպիոն ու Սուպերգավաթակիր։

Վալիդ Ռեգրագին Մարոկկոյի հավաքականը մարզում է 2022թ. օգոստոսի 31-ից։ «Ատլասե առյուծները» նրա գլխավորությամբ 49 խաղում տարել են 36 հաղթանակ, գրանցել 8 ոչ-ոքի, կրել 5 պարտություն։

Մարոկկոն 2026թ. ամռանը կմասնակցի աշխարհի առաջնությանը, որտեղ ընդգրկված է C խմբում ու կմրցի Բրազիլիայի, Շոտլանդիայի ու Հայիթիի հավաքականների դեմ։

Մարոկկոն ՖԻՖԱ-ի դասակարգման աղյուսակում այժմ զբաղենցում է 8-րդ տեղը։

Հ․Գ․ միացե՛ք Interfootball-ի Telegram-ի ալիքին https://t.me/Interfootball_am

Հ.Գ.Գ. միացե՛ք Interfootball-ի Instagram-ի էջին https://shorturl.at/6vBml