ԱԱ-2026-ից հետո ՖԻՖԱ-ի դասակարգման աղյուսակը նոր առաջատար ունի 📸

ՖԻՖԱ-ն հուլիսի 20-ին հրապարակել է հավաքականների դասակարգման թարմացված աղյուսակը։

Աշխարհի նորընծա չեմպիոն Իսպանիայի ազգային հավաքականը 1995,88 միավորով բարձրացել է առաջին տեղ` նախորդ թարմացման համեմատ դիրքը բարելավելով մեկ տեղով։

Նախորդ առաջատար Արգենտինան 1970,37 միավորով այժմ երկրորդն է։ Ֆրանսիան (1948,97) և Անգլիան (1922,83) պահպանել են դիրքը` զբաղեցնելով համապատասխանաբար երրորդ և չորրորդ տեղերը։

Լավագույն տասնյակում մի քանի փոփոխություն ևս տեղի է ունեցել։ Բրազիլիան բարձրացել է 5-րդ, Մարոկկոն` 6-րդ տեղ, իսկ Պորտուգալիան այժմ միայն 7-րդն է։

Բելգիան շրջանցել է Նիդերլանդներին և 8-րդ տեղում է։ Մեքսիկայի հավաքականը դիրքը բարելավել է միանգամից 4 տեղով` 2022թ. մայիսի 31-ի թարմացումից ի վեր առաջին անգամ հայտնվելով թոփ-10-ում։

Մունդիալ-2026-ի մասնակիցներից լավագույն արդյունքը գրանցել է Նորվեգիայի հավաքականը, որը 1651,29 միավորով բարձրացել է 19-րդ տեղ։ «Վիկինգները» դիրքը բարելավել են միանգամից 12 կետով։

Գանան բարձրացել է 8 տեղով և 1387 միավորով 65-րդն է։

Վատագույն արդյունքը գրանցել է Թունիսի հավաքականը` 45-ից նահանջելով 57-րդ տեղ։ Ուզբեկստանը (60) և Հորդանանը (73) կորցրել են 10-ական տեղ։

ՖԻՖԱ-ի դասակարգման աղյուսակի լավագույն տասնյակը հուլիսի 20-ի թարմացումից հետո

1. Իսպանիա (+1) – 1995,88 միավոր
2. Արգենտինա (-1) – 1970,37
3. Ֆրանսիա (=) – 1948,97
4. Անգլիա (=) – 1922,83
5. Բրազիլիա (+1) – 1804,92
6. Մարոկկո (+1) – 1803,99
7. Պորտուգալիա (-2) – 1787,85
8. Բելգիա (+1) – 1778,36
9. Նիդերլանդներ (-1) – 1775,54
10. Մեքսիկա (+4) – 1754,30